काठमाडौं- नेकपा एमालेका अध्यक्ष केपी शर्मा ओलीले भदौ २४ पछि प्रेस स्वतन्त्रतामा गम्भिर धक्का पुगेकोले त्यसका संरक्षण युवा संघले गर्ने बताउनुभएको छ ।
युवा संघ नेपालको केन्द्रीय कमिटी बैठकलाई आज सम्बोधन गर्दै अध्यक्ष ओलीले पछिल्ला दिनमा पत्रकार र सञ्चार माध्यमलाई माघ १९ भन्दा जटिल ह्ँुदै गएको बताउनुभयो । ‘अहिले प्रेस स्वतन्त्रताको अवस्था नाजुक छ । माघ १९ मा पनि यस्तो थिएन’ अध्यक्ष ओलीले भन्नुभयो ‘त्यसबेला सम्पादकका पछि आर्मी लगाइन्थ्यो । समाचार बाचकको पछि आर्मी लगाइन्थ्यो । तर अहिले एउटै टेलिफोनको धम्कीले चारवटा आर्मी भन्दा बढी त्रास फैलाइएको छ ।’
अध्यक्ष ओलीले प्रेस स्वतन्त्रता र लोकतन्त्रका लागि आफू लामो सयम लडेकोले आफ्ना विरुद्ध प्रचार गर्दा पनि कहिले कसैलाई नधम्क्याएको उहाँले बताउनुभयो । ‘मेरा विरुद्ध झुटै समाचार छापे पनि कसैलाई केही भनिएन’ अध्यक्ष ओलीले भन्नुभयो ‘लोकतन्त्रले दिएको प्रेस स्वतन्त्रताको उपभोग गरे भनियो । तर अहिले अवस्था त्यस्तो छैन । सञ्चार क्षेत्र माथी ठुलो धम्की र त्रास छ । यो अवस्था लामो समय हामी रहन दिन्नौ ।’
उहाँले पत्रकारहरुलाई ढुक्कसँग सञ्चारकर्म गर्न भन्दै कोही कतैबाट असुरक्षित महसुष भए युवा संघ नेपाललाई भन्न आग्रह गर्नुभएको छ । ‘तपाईंहरुलाई कोही कसैले धम्की दियो भने युवा संघ नेपाललाई भन्नु । तपाईंहरुको सुरक्षा युवा संघले गर्दछ ’ अध्यक्ष ओलीले भन्नुभयो ‘हात्ती हुँ भन्नेलाई भुसुना बनाउने क्षमता युवा संघसँग छ । ’ अध्यक्ष ओलीले अहिलेको सरकार ब्याट्री सकिएको रोर्बोट जस्तो भएको बताउनुभयो । ‘ब्याट्रीले काम गरुन्जेल रोर्बोट चल्यो । यताउता गर्यो’ अध्यक्ष ओलीले भन्नुभयो ‘ब्याट्री सकिएपछि रोर्बोट जहाँको त्यही अडिएको छ । ’
अध्यक्ष ओलीले एमालेलाई निर्णायक राष्ट्रिय शक्तिको रुपमा अघि बढाउने बताउनुभएको छ । उहाँले एमाले लामो समय देखि राष्ट्रिय शक्ति भए पनि अब निर्णायक राष्ट्रिय शक्तिमा बदल्नु पर्ने बताउनुभएको छ । ‘सरकारका नीतिमा एमाले छ,कार्यक्रममा एमाले छ’ अध्यक्ष ओलीले भन्नुभयो ‘राष्ट्रिय शक्तिको रुपमा रहेको एमालेलाई अब निर्णायक राष्ट्रिय शक्तिमा बदल्नु पर्दछ । ’
