भैरहवा। नेपाल राष्ट्र बैंक सिद्धार्थनगर कार्यालयले भैरहवामा लुम्बिनी प्रदेशमा चालू पुँजी कर्जाको प्रभावकारीता विषयमा सरोकारवाला संग छलफल तथा अन्तरक्रिया कार्यक्रम गरेको छ ।
छलफल तथा अन्तरक्रिया कार्यक्रममा उद्योग व्यवसायीका प्रतिनिधि, चालू पूजी कर्जा उपभोग गरेका व्यवसायी, बैंक तथा वित्तिय संस्थाका कर्मचारी तथा लेखापरिक्षकहरुको सहभागिता रहेको नेपाल राष्ट्र बैंक सिद्धार्थनगर शाखाले जानकारी दिएको छ ।
कार्यक्रममा नेपाल राष्ट्र बैंक सिद्धार्थनगर कार्यालयका निर्देशक रमेश आचार्यले चालु कर्जा पुँजी लगानी मार्गदर्शनमा व्यवसायीहरु गुनासहरुका विषयमा छलफल तथा सुझाव संकलन गर्ने कार्य भएको बताउनुभयो । उहाँले चालु कर्जा पुँजी लगानीको उपभोग र थप प्रभावकारी बनाउने विषयमा अन्तरक्रिया गरिएको जानकारी दिनुभयो । छलफलले नेपाल राष्ट्र बैंकलाई नीतिगत कार्यमा समेत सहयोग पुराउने निर्देशक आचार्यको भनाई रहेको थियो ।
नेपाल उद्योग वाणिज्य महासंघ लुम्बिनी प्रदेशका अध्यक्ष कृष्ण प्रसाद शर्माले चालू पुँजी कर्जालाई लचिलो बनाउनुपर्ने भन्दै व्यवसायीहरुको पक्षमा नीतिगत निणर्य गर्न आग्रह गर्नुभयो । उहाँले बैंकहरुको नीतिगत अस्पष्टताका कारण ठुला उद्योग व्यवसायीहरु, पर्यटन तथा होटल र उत्पादनक्षेत्रका उद्योगहरुले सहज कर्जा प्राप्त नगर्दा अर्थतन्त्र सुस्ताउदै गएको बताउनुभयो । देशको अर्थतन्त्रलाई चलायमान बनाउनका लागि उद्योगी व्यवसायीहरुलाई सहज कर्जा प्रभाव गरि आर्थिक समृद्धिका राष्ट्र बैंकले भुमिका खेल्नुपर्ने अध्यक्ष शर्माले सुझाव दिनुभयो ।
सिद्धार्थ उद्योग वाणिज्य संघ सिद्धार्थनगरका अध्यक्ष नेत्र प्रसाद आचार्यले नेपाल राष्ट्र बैंकको चालू पुँजी कर्जा लगानीमा कडाई गर्दा उद्योगी व्यवसाय धरापमा परेको भन्दै यसलाई सरल बनाउनुपर्ने बताउनुभयो । उहाँले देशले खोजेको र उद्योगी व्यवसायीको पक्षमा सकारात्मक सहयोग पुग्ने प्रकारले चालु कर्जा पुँजी लगानी मार्गदर्शनलाई संशोधन गर्न सुझाव दिनुभयो ।
सिद्धार्थ उद्योग वाणिज्य संघका पूर्व अध्यक्ष तथा युवा व्यवसायी ठाकुर कुमार श्रेष्ठले नेपालको अर्थतन्त्र शिथिल बताउनमा नेपाल राष्ट्र बैंकको चालु कर्जा पुँजी लगानी मार्गदर्शनले अवरोध गरेको बताउनुभयो । नेपाल राष्ट्र बैंकको कर्जा प्रवाहमा जटिलता हुदा देशमा अहिले १ लाख ५० हजार भन्दा बढि उद्योगी, व्यवसायी कालुसुचीमा परेको पूर्व अध्यक्ष श्रेष्ठको गुनासो रहेको छ । उहाँले चालु कर्जा पुँजी लगानी मार्गदर्शनलाई व्यापक रुपमा संशोधन गर्नुपर्ने भन्दै यसैका कारण धेरै उद्योगी व्यवसायी डिप्रेशनमा पुगेको बताउनुभयो । चालु कर्जा पुँजी लगानी मार्गदर्शन हाम्रो माटो सुहादो हुनुपर्नछ । श्रेष्ठले भन्नुभयो, “नेपाल राष्ट्र बैंक कर्जा प्रवाह सम्बन्धी परिभाषालाई बैंकहरुले आफु अनुकुल फरक–फरक व्याख्या गर्दा उद्योगी व्यवासायीलाई समस्या परेका छन् ।” बैंकहरुले उद्योगी व्यवसायीलाई फकाई–फकाई कर्जा प्रदान गर्ने र पछि विभिन्न वहाना बनाएर तनाव दिने प्रवृद्धी नेपालमा रहेको भन्दै यसका अन्त्य हुनुपर्ने माग पूर्व अध्यक्ष श्रेष्ठको माग रहेको छ ।
नेपालमा पछिल्लो समय चालु कर्जा पुँजी लगानी मार्गदर्शनका कारण देशमा अर्थतन्त्रमा प्रत्यक्ष प्रभाव परेपछि उद्योगी व्यवसायी तथा अर्थविदहरुले विरोध जनाउदै आएका छन् । यसको संशोधन र लगानी मैत्री हुनुपर्नेमा सवै पक्षको जोड रहेको छ ।
