नेकपा एमालेका उपाध्यक्ष तथा पूर्व अर्थमन्त्री विष्णुप्रसाद पौडेलले विगतमा आफूले अघि सारेका योजनाहरुलाई पूर्णता दिनका लागि रुपन्देही-२ बाट आफ्नो उम्मेदवारी रहने बताएका छन । रूपन्देही आएका पौडेलले लुम्बिनी प्रदेश पार्टी कार्यालय बुटवलमा बोल्दै आफ्नो निर्वाचन क्षेत्रमा आएर रुपन्देहीलाई भुल्न नसक्ने बताउदै उनले रुपन्देही बासीले पनि आफूलाई भुल्न नसक्ने विश्वास व्यक्त गरे ।
न मैले रुपन्देहीलाई भुल्ने छु, न मलाई रुपन्देहीले भुल्ने छ । शनिबार बसेको एमाले सचिवालय कमिटीको बैठकले पौडेललाई पाल्पा९२ बाट चुनाव उठाउने निर्णयसँगै रुपन्देहीका नेता कार्यकर्ताले आवाज उठाएपछि निर्णय सच्चिएको सन्दर्भमा उनले उक्त कुरा व्यक्त गरेका हुन् । पार्टीको निर्णयभन्दा फरक भएर आफू जान नसक्ने बताउँदै उनले सचिवालय बैठकमा आफूलाई पाल्पा पठाउन छलफल चलाए पनि रुपन्देहीका नेता कार्यकर्ताको बलियो साथले रुपन्देहीमै उम्मेद्वार बनाउने निर्णय गरेको उनले बताए ।
सोमबार पौडेल रुपन्देही आउने भएपछि सयौंको सङ्ख्यामा नेता कार्यकर्ता भैरहवा विमानस्थलमा उनलाई स्वागत गर्न पुगेका थिए । रुपन्देही क्षेत्र नम्बर९३ बाट उम्मेदवारी पाएका बासुदेव घिमिरे, एमाले केन्द्रीय सदस्य गोपाल राना, एमालेबाट समानुपातिक उम्मेद्वार तथा उद्योगी एजाज आलम, एमाले रुपन्देही अध्यक्ष लगायतका नेताहरुका साथै ठूलो सङ्ख्यामा युवा विद्यार्थीले पौडेललाई भैरहवा विमानस्थलबाट बुटवलस्थित पार्टी कार्यालयमा ल्याएका थिए ।
सो अवसरमा आयोजित संक्षिप्त कार्यक्रममा पौडेलले रुपन्देहीका ५ निर्वाचन क्षेत्र मध्ये ४ वटा निर्वाचन क्षेत्रमा एमालेको जित सुनिश्चित भैसकेको र सतप्रतिशत नतिजा ल्याउने लक्ष्यसहित चुनाबी अभियानमा लाग्न आह्वान गरे । उनले सोमबारनै एमाले लुम्बिनीका अध्यक्ष राधाकृष्ण कंडेल तथा रुपन्देही अध्यक्ष यज्ञ गैरेबाट संयुक्त रुपमा चुनावका लागि टिकट ग्रहरण गरेका थिए । कार्यक्रममा रुपन्देही क्षेत्र नम्बर ५ का उम्मेद्वार खिमलाल भट्टराई, रुपन्देही १ का उम्मेद्वार दधिराम न्यौपाने, लुम्बिनीका पूर्व मुख्यमन्त्री लिला गिरी तथा एमाले लुम्बिनीका उपाध्यक्ष भोजप्रसाद श्रेष्ठ लगायतका नेताहरु स्वागतका लागि पुगेका थिए ।
