लुम्बिनी लायन्सले साविक उपविजेता सुदूरपश्चिम रोयल्सलाई पराजित गर्दै सिद्धार्थ बैंक नेपाल प्रिमियर लिग (एनपीएल) को उपाधि जितेको छ ।
लुम्बिनी एनपीएलको नयाँ च्याम्पियन बन्दा सुदूरपश्चिम रोयल्स भने लगातार दोस्रो पटक उपविजेतामै सीमित भएको छ ।
कप्तान रोहित पौडेल, शेर मल्ल र रुबेन ट्रम्पलम्यानको उत्कृष्ट बलिङ प्रदर्शनपछि लुम्बिनीले सुदूरपश्चिमलाई ८५ रनमै अलआउट गरेको थियो । फाइनलमा सुदूरपश्चिमले दिएको ८६ रनको सामान्य लक्ष्य लुम्बिनीले ९ ओभरमै ४ विकेट गुमाएर पूरा गर्दै उपाधि हात पारेको हो ।
लुम्बिनीले च्याम्पियन बन्ने क्रममा पछिल्ला ६ खेलमा लगातार जित हात पारेको छ । पहिलो खेलमा चितवन राइनोजलाई पराजित गरेपछि लगातार तीन खेलमा हार बेहोरेको लुम्बिनी एक समय लिग चरणबाटै बाहिरिने खतारामा पुगेको थियो । तर त्यसपछि सानदार पुनरागमन गर्दै टोलीले अन्ततः एनपीएलको उपाधि जित्न सफल भयो ।
लुम्बिनीका ओपनर दिनेश अधिकारीले सुदूरपश्चिमका कप्तान दीपेन्द्र सिंह ऐरीको पहिलो ओभरमै ४ छक्का प्रहार गरेपछि टोलीले आक्रामक सुरुवात गरेको थियो । सो ओभरमा लुम्बिनीले २७ रन जोडेको थियो ।
दिनेशले विस्फोटक ब्याटिङ गर्दै १३ बलमा १ चौका र ५ छक्का प्रहार गरी ४२ रन बनाए । पहिलो विकेटका लागि उनले डार्सी सर्टसँग ४ ओभरमै ५८ रनको साझेदारी गरेका थिए ।
हेमन्त धामीले पाँचौँ ओभरमा सर्ट र दिनेश दुवैलाई आउट गर्दै साझेदारी तोडे । सर्ट १४ बलमा १३ रन बनाएर पाँचौँ ओभरको पहिलो बलमा बोल्ड भए भने दिनेश सोही ओभरको तेस्रो बलमा स्कट कुगेलेइनबाट क्याच आउट भए ।
कप्तान रोहित पौडेलले १२ बलमा २ चौका र १ छक्का प्रहार गर्दै १६ रन योगदान गरे । निरोशन डिकवेलाले १२ बलमा अविजित ११ रन बनाए भने दिलिप नाथले विजयी रन जोडे ।
त्यसअघि कीर्तिपुरस्थित टीयू अन्तर्राष्ट्रिय क्रिकेट मैदानमा टस जितेर पहिले ब्याटिङ गरेको सुदूरपश्चिम रोयल्स १९.१ ओभरमा ८५ रनमै अलआउट भएको थियो । सुदूरपश्चिमले बनाएको ८५ रन एनपीएल इतिहासको संयुक्त चौथो न्यून स्कोर हो भने फाइनलको सबैभन्दा कम योगफलसमेत हो ।
लुम्बिनीका कप्तान रोहित पौडेल, शेर मल्ल र रुबेन ट्रम्पलम्यानको धारिलो बलिङपछि सुदूरपश्चिमको इनिङ्स धराशायी बनेको थियो ।
सुदूरपश्चिमका लागि ओपनर इशान पाण्डेले सर्वाधिक ३३ रन बनाए । ५१ बल खेलेका उनले १ चौका प्रहार गरे । चौथो विकेटका लागि कप्तान दीपेन्द्र सिंह ऐरीसँग मिलेर उनले २५ रनको साझेदारी गरेका थिए ।
कप्तान दीपेन्द्रले २० बलमा १ छक्का प्रहार गर्दै १३ रन बनाए । हर्मित सिंह र स्कट कुगेलेइनले समान १०–१० रन जोडे ।
सुदूरपश्चिमको इनिङ्स ध्वस्त पार्ने क्रममा लुम्बिनीका रुबेन ट्रम्पलम्यान, रोहित पौडेल र शेर मल्लले समान ३–३ विकेट लिए । रोहितले ११औँ ओभरमा लगातार तीन विकेट लिँदै ह्याट्रिक पूरा गरे । उनले दीपेन्द्र सिंह ऐरी, दीपक बोहरा र पुनित मेहरालाई लगातार आउट गरेका थिए । रोहितले ४ ओभरमा १२ रन मात्र खर्चिए ।
रुबेन ट्रम्पलम्यानले २.१ ओभरमा मात्र ३ रन खर्चेर ३ विकेट लिए भने शेर मल्लले ४ ओभरमा १८ रन दिएर ३ विकेट लिए । तिलक भण्डारीले ४ ओभरमा २६ रन खर्चेर १ विकेट हात पारे ।
कसले के पुरस्कार जिते ?
लुम्बिनीले उपाधि जितेको खेलमा प्रतियोगिताकै सर्वोत्कृष्ट नेपाली खेलाडी लुम्बिनी लायन्सका रोहित पौडेलले ओमोडा कार प्राप्त गरेका छन् । त्यस्तै उत्कृष्ट ब्याटर पनि बनेका उनले पल्सर बाइक पनि प्राप्त गरेका छन् । रोहितले समग्रमा २७६ रन बनाउनुका साथै १० विकेट पनि लिए । यस्तै इनर्जेटिक प्लेयर अफ द टुर्नामेन्ट सुदूरपश्चिमका अविनाश बोहरा घोषित भएका छन् । उनले १७ विकेट लिएका थिए । बोहराले दुई लाख रुपैयाँ पाएका छन् ।
प्रतियोगिताको सर्वोत्कृष्ट खेलाडी लुम्बिनी लायन्सका रुबेन ट्रम्पलमन भएका छन् । उनले १५ विकेट लिए । पुरस्कार ५ लाख रुपैयाँ प्राप्त गरेका छन् । प्रतियोगिताको सर्वोत्कृष्ट बलर विराटगरका सन्दीप लामिछाने बने । उनले पल्सर बाइक प्राप्त गरेका छन् ।
लुम्बिनीका तिलकराज भण्डारी इनर्जेटिक प्लेयर अफ द टुर्नामेन्ट घोषित भएका छन् । प्रतियोगिताको उत्कृष्ट इमर्जिङ खेलाडी लुम्बिनी लायन्सका शेर मल्ल घोषित भएका छन् । उनले पल्सर बाइक प्राप्त गरेका छन् । हिजो भएको फाइनल खेलको प्लेयर अफ द म्याच रुबेन ट्रम्पलमन भएका छन् ।
