भैरहवा । नेकपा (एमाले) रुपन्देहीले पार्टी अध्यक्ष केपी शर्मा ओली र पूर्व गृहमन्त्री रमेश लेखकको गिरफ्तारीको विरोधमा आइतबार जिल्ला प्रशासन कार्यालय, रुपन्देही अगाडि विरोध प्रदर्शन गरेको छ। एमालेका नेता तथा कार्यकर्ताहरूले गिरफ्तारीलाई ‘राजनीतिक प्रतिशोध’ भन्दै तत्काल रिहाइको माग गरेका छन्।
जिल्ला प्रशासन कार्यालय पुगेका एमाले नेता-कार्यकर्ताहरूले प्रमुख जिल्ला अधिकारीमार्फत सरकारलाई ज्ञापनपत्र बुझाउदै प्रशासन कार्यालय अगाडि सरकार विरोधी चर्को नाराबाजी गरेका थिए। जसका कारण केही समय सो क्षेत्रको वातावरण तनावग्रस्त बनेको थियो।
एमालेले यस गिरफ्तारीलाई प्रतिशोधपूर्ण र पूर्वाग्रही कदम गैरकानूनी र अलोकतान्त्रिक व्यवहार विधिको शासनमाथिको प्रहार को संज्ञा दिएको छ।
कार्यक्रमलाई सम्बोधन गर्दै एमाले नेताहरूले २०८२ भदौ २३ र २४ गते भएका घटनाको निष्पक्ष छानबिन हुनुपर्ने माग राखेका छन्। उनीहरूले गौरीबहादुर कार्की नेतृत्वको जाँचबुझ आयोगको प्रतिवेदनलाई ‘पूर्वाग्रहपूर्ण’ भन्दै त्यसलाई तत्काल खारेज गर्न सरकारसँग माग गरे।
उनीहरुले अध्यक्ष केपी शर्मा ओली र नेता रमेश लेखकलाई विना शर्त रिहा गरिनुपर्ने, आन्दोलनका क्रममा भएका तोडफोड, आगजनी र लुटपाटमा संलग्न सबै पक्षमाथि राजनीतिभन्दा माथि उठेर कानुनी कारबाही हुनुपर्ने, घटनामा विभिन्न गैरसरकारी संस्थाहरूको संलग्नताबारे गम्भीर अनुसन्धान हुनुपर्ने, सरकारले आफ्ना कदम नसच्चाए मुलुक पुनः द्वन्द्वतर्फ धकेलिने र एमालेले देशभर थप सशक्त आन्दोलन छेड्ने चेतावनी दिएको छ।
प्रदर्शन शान्तिपूर्ण रहे पनि ठूलो संख्यामा सुरक्षाकर्मी परिचालन गरिएको थियो। माग सम्बोधन नभए भोलिदेखि नै थप आन्दोलनका कार्यक्रमहरू घोषणा गरिने एमाले रुपन्देहीले जनाएको छ।
