भैरहवा । रुपन्देहीको दक्षिणी क्षेत्रमा अवस्थित विद्यालयहरुको साझा संस्था सामुहिक विद्यालय परिवारले वर्षेनी लोक नृत्य प्रतियोगिता गर्दै आएको छ ।
२०५९ सालमा विद्यालयहरु मिली गठन भएको परिवारले हरेक वर्ष जस्तै यस वर्ष पनि लोकनृत्य प्रतियोगितालाई निरन्तरता दिदै १३ वटा विद्यालयको समूह बीच प्रतियोगिता गराएको हो ।
नेपाली कला र लोक संस्कृतिको संरक्षण एवं संवद्र्धन गर्ने हेतुले परिवारको आयोजनामा अन्तरविद्यालय लोक नृत्य प्रतियोगिता भएको परिवारका अध्यक्ष समसाद इद्रीशीले बताए । हरेक बर्ष हुदै आएको प्रतियोगिता यस बर्ष पनि गरेका छौ, प्रतियोगिताले विद्यार्थी सहित समाजमा नेपाली संस्कृति, संस्कार प्रति अवगत हुने र कला संस्कृतिको जर्गेना हुने बताए ।
समूहमा हाल १८ विद्यालयहरुको सहभागिता रहता पनि तीमध्ये १३ समूहको सहभागितामा भएको प्रतियोगितामा न्यू ईरा इंग्लिस वोर्डिङ स्कुल प्रथम, लुम्बिनी सृजना वोर्डिङ स्कुल द्वितिय, संजीवनी शिक्षा सदन तृतिय र आदर्श विद्या मन्दिर सान्तवना भए । विजयी विद्यालयलाई ट्रफि, मेडल र प्रमाण पत्र प्रदान गरिएको परिवारका अध्यक्ष इद्रीशीले बताए ।
अहिले नेपाली समाजमा विस्तारै पश्चिमी संस्कृतिको प्रवेशले यहाको लोक संस्कृतिमा असर परेकोले यसलाई उजागर गर्न र लोक संस्कृतिको संरक्षण्, सम्वद्र्धन जर्गेना गर्नका लागि पनि स्थापनाकालदेखि यस्तो कार्यक्रम परिवारले गर्दै आएको पूर्व अध्यक्ष तथा कार्यक्रम संयोजक गोकुल पोखरेलले बताए । यसले विद्यार्थीहरुमा हाम्रो लोक संस्कृति प्रति आकर्षण हुने अपेक्षा पनि रहेको छ ।
यसै अवसरमा परिवारको विद्यालयबाट एसईई २०८१ मा सर्वोत्कृष्ट अंक ४ जिपिए ल्याउने न्यू इरा इंग्लिस स्कुलका छात्रा आस्था सुनार एवं ३ दशमलव ९१ अंक ल्याएका दिवस गौतमलाई नगद सहित सम्मान गरिएको थियो ।
विजेता समूह र सम्मानित विद्यार्थीहरुलाई सिद्धार्थनगर नगरपालिकाका नगरप्रमुख ईस्तियाक अहमद खाँ, निर्णायकद्वय अनु रजक, प्रियंका थापा, अध्यक्ष ईद्रिशी, उपाध्यक्ष सृजना पाठक, सचिव कमल कोइरालापूर्व अध्यक्ष एवं सल्लाहकारहरुले सम्मान गरेका थिए । सो अवसरमा बोल्दै अतिथीहरुले यस्तो प्रतियोगिताले बालबालिकाको चौतर्फी बिकास संग संगै संस्कार सस्कृतीको ज्ञान बालबालिका सम्म पुर्याउन सहयोग गर्ने ,विद्यार्थीको प्रतिभा प्रस्पुटन गर्ने र नेपालीको लोक संस्कृतीको सिकाईमा टेवा पुर्याउने बताए ।
कक्षा ६ देखि १० सम्ममा अध्ययनरत विद्यार्थी विच भएको प्रतियोगितामा निर्णयकले मौलिकता, प्रस्तुती, श्रृंगार, भेषभूषा, ताल र भाव, कोरियोग्राफी र सैधान्तिकको आधारमा मुल्याङकन गरेका थिए ।
